Kuvendi i Shqipërisë miraton Buxhetin 2024, në tym e flakë

Pesë minuta ka zgjatur seanca e Kuvendit të Shqipërisë, ku do të diskutohej Projektbuxheti për vitin 2024.

Deputetët e opozitës grumbulluan sërish karriget në foltore, ndërsa janë përplasur fizikisht me disa prej punonjësve të Gardës. Përkundër kontrolleve në hyrje të Kuvendit, nuk i ndaluan deputetët e opozitës të merrnin edhe këtë seancë flakadanët, të cilët i ndezën në nisje të seancës plenare.

Situata u bë më kaotike kur njëri prej flakadanëve mori flakë, e i cili u fik nga punonjësit e Gardës.

Deputetët e opozitës kundërshtuan vendosjen e Gardës në Kuvend, ndërsa ish-kryeministri Sali Berisha hyri live në Facebook, raporton Top Channel.

“Buxheti i vjedhjes më të madhe të tyre, buxheti i gjobës ndaj shqiptarëve, i shpërdorimit, i rrugëve të cilat kushtojnë 12 mln euro kilometri, buxheti i ppp-ve. Sot në Parlament janë 1340 gardistë brenda në ambientet përreth, Renea-s dhe forcat speciale. Opozita do të qendojë e pamposhtur në mbrojtje të të drejtave legjitime për të hetuar qeveritarët hajdutë që me vendimet e tyre kanë vjedhur dhe do të vijojnë të vjedhin”, tha ai.

Ish-kryeministri Sali Berisha, në një deklaratë për shtyp menjëherë pas përfundimit të seancës plenare, tha: Projektbuxheti u kalua në mënyrë antikushtetuese dhe antiligjore në një seancë që zgjati 5 deri 7 minuta.

Nga ana tjetër, kreu i Grupit Parlamentar të PS-së, Bledi Çuçi, ka deklaruar jashtë Kuvendit se situata kaotike në Kuvend është e njëjta skenë e krijuar nga opozita.

“E njëjta skenë. E vetmja e re është miratimi i buxhetit më të madh publik në historinë e 32 vjetëve. Janë 7 miliardë euro që është dyfishi i buxhetit të 2013-ës. Sot që ata duhet të flisnin, pamë të njëjtin skenar. E vetmja gjë që duhet t’i mbetet në mendje çdo shqiptari është buxheti që sapo miratuam 400 milionë euro plus për rritjen e pagave”, u shpreh Çuçi, përcjell albinfo.ch.