Kuvendi voton Ligjin për sigurimet shëndetësore, kalon edhe “Ligji për çmimet tavan”

Projektligji për sigurimin e detyrueshëm të kujdesit shëndetësor u votua me 80 vota pro, ndërsa ligji për masat e përkohshme të produkteve themelore u miratua vetëm me votat e mazhorancës

Kuvendi i Kosovës ka miratuar në lexim të dytë Projektligjin për sigurimin e detyrueshëm të kujdesit shëndetësor, me 80 vota pro, asnjë kundër dhe asnjë abstenim, përcjell albinfo.ch.

Gjatë diskutimit në seancë, deputeti i PDK-së, Uran Ismaili, kritikoi procesin, duke e cilësuar të papranueshme mungesën e ministrit të Shëndetësisë, Arben Vitia, në Komisionin për Shëndetësi.

Ai tha se ligji ka ardhur me vonesë dhe se reforma në sigurimet shëndetësore është dashur të ndodhte më herët, pasi qytetarët, sipas tij, po përballen çdo ditë me mungesë të barnave dhe materialeve shpenzuese edhe në QKUK.

“Mendoj që ky ligj është vonë… Qytetarët blejnë barna edhe pse janë në listë esenciale sepse mungojnë gjërat elementare. Ka boshllëqe të mëdha dhe 13 akte nënligjore janë paraparë rrugës. Ne do ta mbështesim, por qytetarët do të përballen edhe gjatë me mungesë të shërbimeve shëndetësore”, deklaroi Ismaili.

Ndërkaq, deputetja e AAK-së, Albana Bytyqi, tha se projektligji është mbështetur, por theksoi se rezultati do të varet nga zbatimi praktik.

Në të njëjtën seancë, Kuvendi ka miratuar në lexim të dytë edhe Projektligjin për ndryshimin dhe plotësimin e Ligjit për Kontabilitet, Raportim Financiar dhe Auditim, si dhe Projektligjin për Shërbimet e Pagesave.

Ndërkohë, vetëm me votat e mazhorancës është miratuar në lexim të dytë edhe Projektligji për Masat e Përkohshme të Produkteve Themelore në Raste të Veçanta të Destabilizimit në Treg, i njohur në publik si “Ligji për çmimet tavan”.

Ky projektligj u miratua me 63 vota pro, pa vota kundër dhe pa abstenime, ndërsa opozita nuk mori pjesë në votim.

Deputetët e opozitës e kundërshtuan ligjin duke argumentuar se nuk janë adresuar kërkesat e tyre, veçanërisht sa i përket krijimit të një bordi, pavarësisë së tij, mungesës së metodologjisë së qartë për përcaktimin e marzhës dhe formulimit të ligjit.

Deputeti i PDK-së, Arben Mustafa, deklaroi se janë për një ligj që ndalon abuzimet në treg, por jo në formën aktuale.

“Nuk mund të lejojmë që një trup të vlerësojë se çfarë përbën rritje të paarsyeshme… duhet metodologji e qartë. Prandaj nuk do të marrim pjesë në votim”, tha ai.

Edhe deputetja e LDK-së, Janina Ymeri, deklaroi se ligji mund të jetë i ndikuar politikisht, ndërsa deputeti Avdullah Hoti e cilësoi projektligjin “fund e krye antikushtetues”.

Nga ana tjetër, deputetja e LDK-së Hykmete Bajrami e quajti ligjin farsë politike, ndërsa deputeti i AAK-së Besnik Tahiri tha se Qeveria është dashur të ndërmarrë masa të tjera, si ulja e akcizës dhe TVSH-së, në vend të krijimit të institucioneve të reja.

Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, iu kundërpërgjigj kritikave duke theksuar se ligji aktivizohet vetëm në rast të destabilizimit të tregut dhe se ka të bëjë me 14 produkte esenciale të shportës bazë.

Ajo tha se qëllimi është mbrojtja e kategorive më të ndjeshme dhe se bordi do të përzgjidhet përmes konkursit të hapur dhe do të votohet nga Kuvendi.

Kujtojmë se Kuvendi kishte miratuar në parim këtë projektligj edhe më 10 prill 2026, mes kundërshtimeve të opozitës.

“Lojërat Mesdhetare” kalojnë në Kuvend

Deputetët kanë miratuar Projekligjin për Lojërat Mesdhetare “Prishtina 2030”

Ai mori mbështetjen e 64 ligjvënësve në seancën e sotme parlamentare.

Ky projektligj kishte kaluar në ekzekutiv në vitin 2024. Ky projektligj parasheh që Lojërat Mesdhetare të shpallen si çështje me rëndësi të veçantë për shtetin e Kosovës.

Të drejtën për organizimin e Lojërave

Mesdhetare Kosova e fitoi në Asamblenë e Përgjithshme të Komitetit Ndërkombëtar të Lojërave Mesdhetare të zhvilluar në Greqi në 2023-ën

Kosova do të jetë organizatore e këtyre lojërave për herë të parë – nga 24 korriku deri më 4 gusht 2030 – në atë që do të ishte ngjarja më e madhe sportive e zhvilluar në vend deri më tani./Albinfo.ch

---