Leonardo DiCaprio: 15 milionë dollarë për të mbrojtur mjedisin

Aktori Leonardo DiCaprio ka njoftuar se do të dhurojë 15.6 milion dollarë për programet e mbrojtjes së mjedisit dhe ruajtjes, që synojnë luftimin e ndryshimit të klimës, përcjell albinfo.ch

Paratë do të dhurohen përmes fondacionit që mban emrin e aktorit.

Fondacioni i tij u krijua me idenë për të mbrojtur vendet e fundit të egra të botës dhe për të shpëtuar jetën e egër të rrezikuar nga zhdukja.

Aktori shprehet se “ndryshimi i klimës është realitet dhe po ndodh tani, është rreziku më i madh që kërcënon njerëzimin”.

Që nga viti 1998 dhe deri më tani, Fondacioni Leonardo DiCaprio (LDF) ka financuar më shumë se 200 projekte në 50 vende dhe pesë oqeane. Projektet që mbështesin 132 organizata, me dhurime në vlerë 59 milionë dollarë të investuar në mbrojtjen dhe ruajtjen e mjedisit, përcjell albinfo.ch.

---