“L’Equipe”: Ndërron jetë kreatori i njohjes së futbollit kosovar

Kryetari i Federatës së Futbollit të Kosovës, Fadil Vokrri, i cili ishte kreatori i njohjes së futbollit kosovar nga UEFA dhe FIFA në vitin 2015, vdiq të premten në moshën 57-vjeçare

E përditshmja franceze sportive me renome botërore, “L’Equipe” ka njoftuar lexuesit për vdekjen e Fadil Vokrrit, menjëherë pas bërjes publik të këtij lajmi të kobshëm. Në artikullin e saj, gazeta në fjalë shkruan:

Kreu i Federatës së Futbollit të Kosovës ishte një ish-futbollist ndërkombëtar jugosllav. Ai kishte luajtur edhe në Francë, tek ekipi i Ligës së parë franceze, Nimes.

Kryetari i Federatës së Futbollit të Kosovës, Fadil Vokrri, i cili ishte kreatori i njohjes së futbollit kosovar nga UEFA dhe FIFA në vitin 2015, vdiq të premten në moshën 57-vjeçare.

Ish-sulmuesi, Fadil Vokrri kishte veshur dymbëdhjetë herë trikonë e përfaqësueses së ish-Jugosllavisë në vitet 1980 (6 gola) dhe ka luajtur në ekipe si ajo e Fenerbahçes, por edhe tek ekipi i Ligës së Parë franceze, në Nimes (duke shënuar 13 gola në 24 ndeshje në sezonin 1989-1990).

Ish-Ministri i Jashtëm i Kosovës, Enver Hoxhaj, ka shprehur ngushëllime për Fadil Vokrrin, shkruan më tej gazeta, informon Albinfo.ch.

“L’Equipe” gjithashtu kishte realizuar një intervistë me Fadil Vokrrin e ndjerë më 4 maj të vitit 2016, një ditë pasi Kosova ishte pranuar anëtare e UEFA-s. Në pyetjet e gazetarit francez lidhur me reagimin e ashpër të Serbisë për këtë veprim, Vokrri ishte përgjigjur: “Gjithçka ka përfunduar për Serbinë. Kosova është pranuar nga 111 vende të botës (gjithashtu edhe nga Franca)”.

Nga ana tjetër, ai i është përgjigjur edhe pyetjes se përse disa shtete si Rusia, Spanja, Rumania apo Greqia nuk e pranojnë Kosovën. Legjenda e futbollit kosovar ka përfunduar: “Bëhet fjalë për sport e futboll, e ne do të vazhdojmë të luajmë. Për të tjerat, politika le ta ndjekë itinerarin e saj”.