Lia e majmunëve, si po përgatitet Zvicra

Lija e majmunëve është më pak e transmetueshme se koronavirusi

Me të paktën tri raste, numri i infeksioneve të konfirmuara në Zvicër është i ulët. Infeksioni i parë në Bernë u pasua me raste në Gjenevë dhe Cyrih. Dy rastet e para lidheshin me udhëtime jashtë vendit.

Sipas FOPH, virusi i Lisë së majmunit është mesatarisht i transmetueshëm nga kafshët (kryesisht brejtësit) te njerëzit dhe nga personi në person. Transmetimi zakonisht ndodh përmes kontaktit të ngushtë me njerëz ose kafshë të infektuara. Kjo zakonisht ndodh përmes kontaktit të drejtpërdrejtë me lëkurën ose mukozën (sytë, hundën, gojën, organet gjenitale etj.). Kontakti seksual me një person të infektuar rrit mundësinë e transmetimit nga njeriu te njeriu. Kontakti me sekrecione ose gjak të infektuar, pika të mëdha të frymëmarrjes dhe kafshimet nga kafshët e infektuara gjithashtu mund të çojnë në transmetim. Përveç kësaj, kontakti me objekte të kontaminuara, të tilla si rroba, liri krevati ose artikuj higjienike mund të çojë në infeksion, përcjell albinfo.ch.

Simptomat përfshijnë ënjtje të rëndë të nyjeve limfatike, temperaturë (38,5°C ose më e lartë), dhimbje koke, dhimbje muskujsh dhe shpine, dridhje dhe rraskapitje. Në mënyrë tipike, por jo gjithmonë, pas disa ditësh shfaqet një skuqje me vezikula, pastaj pustula dhe në fund kore. Skuqja shpesh fillon në fytyrë dhe më pas përhapet në pjesë të tjera të trupit, duke përfshirë pëllëmbët e duarve, shputat e këmbëve dhe organet gjenitale. Në mënyrë tipike, koha e inkubacionit është 5 deri në 16 ditë, përcjell tutje albinfo.ch.

Duke pasur parasysh praninë e sëmundjes në Zvicër, FOPH po shikon opsionet e vaksinës, sipas RTS. Ndërsa nuk ka një vaksinë specifike për linë e majmunëve, një numër vaksinash për sëmundje të tjera janë efektive. Vaksinat e gjeneratës së parë dhe të dytë kundër lisë janë efektive kundër lisë së majmunëve. Këto vaksina janë përdorur në Zvicër deri në vitin 1972. Personat e vaksinuar me këto vaksina ndoshta do të kenë një shkallë të caktuar imuniteti, por sa i mirë është ky imunitet nuk dihet.

Një vaksinë e gjeneratës së tretë kundër lisë, e cila gjithashtu ofron mbrojtje kundër lisë së majmunëve dhe është e autorizuar në BE, aktualisht nuk është e autorizuar ose e disponueshme në Zvicër.

Lia e majmunëve është më pak e transmetueshme se koronavirusi.

---