Limaj e fton presidentin e Barcelonës ta vizitojë Kosovën

Zv.kryeministri i Qeverisë së Kosovës, Fatmir Limaj, përmes rrjeteve sociale ka njoftuar se me ftesë të presidentit të Barcelonës, Josep Mara Bartomeu, ka qenë në “El Clasicon” e të dielës ndërmjet Barcelonës dhe Real Madridit.

“Ishte kënaqësi që me ftesë të presidentit të klubit të futbollit Barcelona, Josep Maria Bartomeu, ta përcillnim bashkë ndeshjen në mes të gjigantëve të futbollit Barcelona dhe Real Madrid. Bartomeu e njoftova se Kosova ka plot talent të rinj të futbollit, të cilët kanë nevojë për përkrahjen dhe përvojën e klubeve si Barcelona”, ka shkruar Limaj, përcjell albinfo.ch.

Ai ka njoftuar se e ka ftuar presidentin Bartomeu që në një të ardhme të afërt ta vizitojë Kosovën për t’i parë mundësitë e mbështetjes që klubi i Barcelonës mund t’ua ofrojë talenteve të futbollit të Kosovës. “Kosova është e bekuar që ka miq gjithandej botës”, është shprehur Limaj.