Loris Muçaj , 4 vjeçar – model në Zvicër

Me vetëm 4 vjeç, tashmë ai është një modelist. Loris Muçaj nga Wohleni i kanton Aargau ka fituar çmime të shumta në një konkurs të mbajtur në Antalia të Turqisë, ndërsa së shpejti do të paraqitet në një reklamë të pizhameve për fëmijë të “Migrosit”.

Ai bën sfilatë në kopshtin e shtëpisë së familjes së tyre në Wohlen. Loris Muçaj përpiqet të dalë sa më bukur para kamerës. Ndalet. Ndërron krahët dhe si një profesionist i modelimit heq syzet e diellit nga fytyra. Lorisi është vetëm katërvjeçar. “Lorisi e ka bërë kështu gjithmonë, që kur ishte shumë i vogël”, ka thënë nëna e tij, Shqipe Morina – Muçaj. “Sapo dikush ta ketë një aparat në dorë, ai menjëherë fillon të marrë poza”, shprehet ajo për “20 min”, transmeton albinfo.ch.

Karrierën për modelim Lorisi e filloi para një viti. Nëna e tij dërgoi disa fotografi që i kishte në celularin e saj një agjenci modelimi të fëmijëve në Zvicër. Menjëherë ajo pranon një telefonatë për të bërë Lorisi një fotosesion për reklamimin e pizhameve për “Migros”. “Spontanisht e pranova ofertën”, thotë nëna 34-vjeçare. Nga vera pritet që fytyra e tij të jetë e pranishme në paketimin e pizhameve të kësaj firme. Si shpërblim për këtë marketing, agjencia e ka paguar me para dhe me veshje të pizhameve.

Përfaqëson Kosovën në Turqi

Pas përfundimit të marrëveshjes për reklamimin e pizhameve dhe realizimit të disa fotografive profesioniste, Shqipja merr edhe një telefonatë tjetër. Këtë herë është një agjenci marketingu nga Kosova, e cila i ofron Lorisit të marrë pjesë në një konkurs bukurie për fëmijë në Antalia të Turqisë. “Kam menduar gjatë se çfarë të bëj, në fund pranova”, thotë ajo. Gjatë javës së kaluar pothuajse e gjithë familja udhëtoi për ta përkrahur djaloshin e vogël në “Festivalin Model & Talent World 2015”.

Rreth 40 vajza dhe djem të moshës 4 -18 vjeç nga shtete dhe kontinente të ndryshme merrnin pjesë në këtë konkurs bukurie. Lorisi përfaqësoi Kosovën. Lorisi u paraqit në skenë me një veshje Rock & Roll dhe këndon një këngë shqipe.

2400 fansa në Facebook

Në këtë konkurs bukurie ai u shpërblye me çmime të shumta në kategorinë e moshës së tij: Çmimi kryesor ishte “Prince of the World”, pastaj fitoi çmimin e parë “Gentelmen”, si dhe çmimin e parë për “Styling”.
“Sfilatat janë specialitet i tij”, thotë nëna e tij, Shqipja.  Ai ka talent edhe për futboll dhe luan për ekipin e “Lenzburgut”. “Unë e shoh që modelimin e pëlqen, por asnjëherë nuk do t’ia imponoj që të zgjedhë drejtimin e jetës së tij”, është shprehur nëna e Lorisit, Shqipe Morina – Muçaj.
Përderisa Lorisi kënaqet me sukseset e tij, prindërit do ta vazhdojnë ta mbështetin në aktivitetet e tij, ndërsa tashmë ai ka edhe një fanpage në “Facebook”, e cila ka arritur afro 2400 fansa.