Lufthansa heq shitjet në fluturime derisa Swiss vazhdon me to

Parfume, cigare, syze dielli: kompania ajrore gjermane Lufthansa nuk do t'i shesë më këto produkte gjatë fluturimeve të gjata. Ndërkohë, kompania bijë SWISS do të vazhdojë shitjet në bord, të paktën për momentin.

Lufthansa po heq dorë nga shitjet në bord për arsye ekonomike, konfirmoi një zëdhënës për agjencinë gjermane të lajmeve DPA. Shkaku kryesor është rënia e kërkesës së bashku me kostot e larta të blerjes. Platforma “Aero Telegraph” kishte raportuar më parë për këtë zhvillim.

Ky vendim do të zbatohet në të gjithë rrjetin e markës kryesore të Grupit Lufthansa, duke filluar nga shtatori. Lufthansa, prej kohësh, nuk ofron më shitje produktesh në fluturimet me distancë të shkurtër, transmeton albinfo.ch.

Ndërkohë, Swiss International Air Lines (SWISS), e cila, bashkë me Lufthansa dhe Edelweiss, është pjesë e Grupit Lufthansa, aktualisht nuk sheh arsye për të ndjekur të njëjtën rrugë. Një zëdhënës i SWISS tha për agjencinë e lajmeve AWP se kompania është e kënaqur me ecurinë e biznesit, pa dhënë shifra të detajuara.

---