Lutje në gjuhën shqipe në Katedralen e Vjenës

Tryezën shqiptare në këtë manifestim e vizitoi edhe Zëvendësipeshkvi, Dr. Franz Scharl, i cili njoftoi për zhvillime më të reja në këtë Dioqezë, me fokus të veçantë për të ardhmen e Misionit Katolik Shqiptar në Austri, i cili muajve të kaluar është përballur me disa sfida dhe vështirësi organizative. Kjo ishte edhe arsyeja pse këshilltarët e këtij misioni sot shpalosen një mbishkrim me tekstin: ‘‘Qëndrojmë me kishën tonë!’’ (,,Wir stehen zu userer Kirche!’’).

Në praninë e qindra besimtarëve të dielën u mbajt mesha festive “E diela e Kombëve” në Vjenë, e cila iu dedikua  emigrantëve nga e tërë bota në ditën ndërkombëtare të tyre. Meshën e udhëhoqi Monsinjor Dr. Franz Scharl, Zëvendësipeshkv i Vjenës, i cili, ndër të tjera, veçoi përkushtimin e misioneve të ndryshme katolike të cilat kryejnë shërbesa fetare në gjuhët e tyre amtare, ndër ta edhe Misioni Katolik Shqiptare në Austri. Ky mision, tash e pothuajse 35 vite, bashkon besimtarët në lutje në gjuhën shqipe duke qenë, bashkë me misionet tjera në gjuhën kroate, sllovene, hungareze, çeke, sllovake, rumune, angleze, franceze, spanjolle, etj. pjese përbërëse e komunitetit të madh të krishterë në Austri.

Edhe këtë ditë përfaqësimi i shqiptarëve ishte në nivel të lakmueshëm si për nga numri i pjesëmarrësve në këtë meshë të shenjte ashtu edhe për nga përfaqësimi. Një moment emocional ishte dorëzimi i dhuratave për Dr. Scharl që e bënë bashkëshortët Zoje dhe Kastriot Deda duke i dhuruar atij dy flamuj, atë kombëtar dhe të shtetit të Kosovës.

Në pjesën e tretë të meshës në Katedralen më të njohur në Austri, në “Stephansdom”, u dëgjua lutja ‘‘Aty Ynë‘‘ edhe në gjuhen shqipe, gjë që u mirëprit nga të pranishmit.

Pas meshës, nga Misionet e ndryshme u shtruan ushqime dhe pije vendore duke pasuruar tryezën e përbashkët krishtere në Austri.

Edhe nga komunitet ynë pati gatime tradicionale të përgatitura nga familjet shqiptare. Aty valuan flamujt e Shqipërisë, Kosovës dhe Austrisë si dhe u gostitën mysafirët nga bashkësisë e tjera gjuhësore. Tryezën shqiptare në këtë manifestim e vizitoi edhe Zëvendësipeshkvi, Dr. Franz Scharl, i cili njoftoi për zhvillime më të reja në këtë Dioqezë, me fokus të veçantë në të ardhmen e Misionit Katolik Shqiptar në Austri, i cili muajve të kaluar është përballur me disa sfida dhe vështirësi organizative. Kjo ishte edhe arsyeja pse këshilltarët e këtij misioni sot shpalosen një mbishkrim me tekstin: ‘‘Qëndrojmë me kishën tonë!’’ (,,Wir stehen zu userer Kirche!’’).

Pritet që në javët në vazhdim të gjendet një zgjidhje edhe për vendin ku do të thuhen meshat në gjuhën shqipe, të cilat tash e më shumë se 30-të vite kremtohen në kishën ‘‘Hildegard Burjan’’ në distriktin e 15-të në Vjenë.

 

 

---