Maqedoni: Gjithnjë e më pak banorë, popullsia në plakje

Për të parandaluar këtë tendencë është miratuar Strategjia Kombëtare për zhvillim demografik, ku veçohet masa e stimulimit të natalitetit

Popullsia në botë po rritet, kurse Maqedonisë po i ulet gjithnjë numri i banorëve dhe popullsia është në plakje, raporton DW.

Vendi e kaloi pragun e moshës demografike, 15 për qind e popullsisë është mbi moshën 60 vjeçe, ndërsa numri i lindjeve është gjithnjë e më i vogël.

Sipas statistikave, tri vitet e fundit ka një rritje të shtimit natyror të popullsisë, por nëse ai krahasohet me numrin e personave të moshuar, përqindja është jo-proporcionale, thotë Spiro Ristovski ministër i punës dhe politikës sociale.

Duke pasur parasysh këtë trend negativ demografik, qeveria e Maqedonisë ka miratuar Strategjinë Kombëtare për zhvillim demografik.“Më këtë strategji parashikohet stimulimi i natalitetit, me të cilin familjet fitojnë të drejtën për shtesë të parave për fëmijët, për fëmijën e parë dhe të tretë. Me këto masa ne i stimulojmë qytetarët që të rrisin numrin e anëtarëve të familjes”, shprehet ministri Ristovski.

Qeveria nuk i ka ndërmarrë të gjitha masat e duhura për mbrojtjen nga plakja e popullsisë apo zbutjen e këtij procesi që është një proces global, thotë profesori universitar Hasan Jashari. Stimulimi i natalitetit nuk është masë e mjaftueshme.

“Lehtësimin e ardhjes së çifteve të reja nga vendet e botës së tretë në Maqedoni. Masat e tjera kanë të bëjnë me përmirësimin e jetesës, mbrojtjes së fëmijëve, shëndetin publik të nënës, masat për përmirësimin e banimit, shkollimit të gjeneratave të reja”, thotë Jashari.