Maqedoni: Mbi 300 mjekë shqiptarë janë shpërngulur në pesë vitet e fundit

Kryetari i Shoqatës së Mjekëve Shqiptarë, Nevzat Elezi ka njoftuar se mbi 300 mjekë shqiptarë nga Maqedonia kanë shkuar të punojnë në spitale jashtë vendit në pesë vitet e fundit, teksa sipas tij, vetëm këtë vit, ky numër është më shumë se 50.

Ai u shpreh se jo vetëm mjekët e rinj, por edhe mjekët në moshë dhe personeli tjetër mjekësor si infermierët, fizoterapistët dhe gjinekologët po largohen, raporton Alsat, përcjell albinfo.ch.

“Ka disa faktorë për këtë situatë. Një nga arsyet pse mjekët e rinj largohen nga vendi janë kushtet e këqija. Ata rrallë shkojnë në specializim, nuk regjistrohen në konkurse. Këtu janë edhe specializimet e gjata, të cilat zgjasin gjithsej 6 vjet”, ka thënë ndër të tjera ai.

Ndryshe, sipas shoqatës, në nivel shtetëror, më së shumti mungojnë pediatër, gjinekologë dhe psikiatër.

Spitalet e Tetovës, Kumanovës, Strugës dhe Kërçovës kanë mungesë të specialistëve në fusha të ndryshme.