Maqedoni: Policia shkatërron rrjetin që kontrabandonte makina luksoze nga BE

Policia shkatërroi grupin e organizuar kriminal që kontrabandonte makina luksoze.

Sipas MPB-së, bëhet fjale për një grup kriminal që bënte kontrabandë dhe falsifikonte automjete të shtrenjta që vidheshin në shtete të ndryshme të BE-së dhe më pas silleshin dhe shiteshin në Maqedoninë e Veriut, shkruan Alsat.

Sipas prokurorisë në mesin e të dyshuarve janë dy zyrtarë – të punësuar në shërbimet administrative për regjistrimin e automjeteve si dhe një shtetas grek.

“Personat gjatë vitit 2021 dhe 2022, me dokumente të falsifikuara dhe numra të modifikuar të shasisë, kanë futur në vend automjete që ishin objekt i kërkimit ndërkombëtar, si dhe automjete për të cilat në mënyra të tjera i kanë shmangur kontrollet doganore. Automjetet i kanë regjistruar këtu dhe një pjesë të tyre i kanë shitur mes vete disa herë për të fshehur kontrabandën, pas së cilës i kanë shitur te përdoruesit përfundimtarë”, thonw nga Prokuroria Themelore Publike Shkup.

Policia zbardhi se bastisje janë kryer te 10 persona në qytete të ndryshme të vendit.

“Janë kryer 10 bastisje tek 10 persona në disa lokacione në Shkup, Negotinë, Dojran dhe Manastir. Nga kontrollet janë gjetur dokumente të ndryshme, rreth 25 gramë kokainë, laptopë, telefona dhe sende të tjera që lidhen me krimet”, tha Goce Andreevski – Zëdhënës i Ministrisë së Punëve te Brendshme.

Prokuroria njoftoi se do të nisë procedurë kundër gjithsej 10 personave për të cilët ekziston dyshim i bazuar se kanë marrë pjesë në veprime të kontrabandës, falsifikimit të dokumenteve, si dhe fshehjes së mallrave që janë objekt i kontrabandës dhe mashtrimit doganor.

Ndërkaq procedura ndaj shtetasit grek do të zhvillohet në Greqi.