Maqedoni: Shoferi humbi kontrollin e autobusit

Ministri i Shëndetësisë, Venko Filipçe, ka konfirmuar se numri i viktimave ka shkuar në 13, shtatë prej të cilëve kanë ndërruar jetë në vendin e ngjarjes, ndërsa të tjerët në spital. Thuajse të gjithë të aksidentuarit janë të moshës madhore, jozyrtarisht raportohet se në mesin e të lënduarve nuk ka asnjë fëmijë. ndërkohë që në spitalin “8 shtatori” janë pranuar gjithsej 33 persona, shkruan AlsatM, përcjell albinfo.ch.

Para spitalit “8 shtatori” vërehet një numër i madh i familjarëve të të aksidentuarve.

Shoferi i automjetit i ka shpëtuar aksidentit. Ndërkaq, sipas të dhënave të para nga burime nga Ministria e Brendshme, pas marrjes në pyetje të shoferit të autobusit, mësohet se shkak për aksidentin nuk ka qenë plasja e gomës, por pikërisht humbja e kontrollit të automjetit nga ana e shoferit.

Në anën tjetër, zyrtarët kanë njoftuar se hetimet në lidhje me aksidentin do të vazhdojnë edhe nesër.