Maqedonia

Maqedoni: Zgjedhjet e parakohshme, partitë “nisin” fushatën

Vetëm një ditë pas vendimit të liderëve politikë për organizimin e zgjedhjeve të parakohshme parlamentare, partitë kanë filluar fushatën jozyrtare. Në konferencat e tyre për media LSDM-ja dhe VMRO-DPMNE-ja ftojnë qytetarët të votojnë politikat e tyre dhe para kohe e konsiderojnë veten fituese të zgjedhjeve që do të mbahen. Palët nuk pranojnë të kenë filluar diskutimet brendapartike për kuadrot e reja të qeverisë teknike. Nga partia e Zoran Zaevit thonë se akoma nuk kanë vendosur për emrin e kryeministrit teknik

E hënë, 21 Tetor 2019 - 17:05 albinfo.ch

As VMRO-DPMNE-ja nuk pranon të ketë në tavolinë emra konkretë, të cilët do të vijnë në postin e ministrit të Brendshëm ose ministrit për Punë dhe Politikë Sociale. Sipas Kodit Zgjedhor, përveç këtyre dy dikastereve, opozitës i takojnë edhe postet e tre zv.ministrave.

VMRO-DPMNE-ja thotë se mbetet e hapur për bashkëpunime dhe koalicione edhe me parti të tjera, përfshirë edhe ata shqiptare.

Kabineti i ri qeveritar teknik duhet të kompletohet më 3 janar, 100 ditë përpara zgjedhjeve të cilat, në bazë të marrëveshjes së liderëve pritet të mbahen më 12 prill. Deri më 3 janar do të ndodhë edhe dorëheqja e kryeministri Zaev dhe në vend të tij të vij kuadër i ri nga radhët e pushtetit. Në opinion nuk kanë vonuar të qarkullojnë edhe emrat e personave që mund ta zëvendësojnë atë. Mes tjerash, për postin e kryeministrit teknik janë përfolur ministri i Brendshëm aktual, Oliver Spasovski, ose ministrja e Punës dhe Politikës Sociale, Milla Carovska. Të dy të përfolurit njëkohësisht do të duhet të lëshojnë kolltuqet e tyre për kuadrot e opozitës, shkruajnë mediat shqiptare, përcjell albinfo.ch.

 Të ngjashme

“Angazhohem për cilësi të jetës duke e ndier afër kulturën time të origjinës”

 Të tjera nga Maqedonia

Shqiptarët dhe rreziku i rikthimit të politikave monoetnike në Maqedoninë e Veriut

 E-Diaspora

 Jeta në Zvicër