Berna zgjat masat deri më 7 dhjetor, dy javë më shumë se niveli federal

Qeveria shpreson që brenda dy ose tri javësh do të jetë në gjendje të vendosë të zbusë masat në nivelin e vendosur nga federata

Në Kantonin e Bernës, ambientet që kanë qasje të publikut, si kinematë, teatrot, sallat e koncerteve, pishinat e mbyllura dhe qendrat e fitnesit do të qëndrojnë të mbyllura deri më 7 dhjetor.

Këtë njoftim e ka dhënë sot Këshilli Qeveritar i këtij kantoni.

Ai ka vazhduar masat e kufizimeve për koronavirus, të cilat fillimisht, në nivel federal  ishin caktuar të zbatohen deri më 23 nëntor.

Me vendimin e ri por edhe më parë, Kantoni i Bernës ka dëshmuar se vazhdon të shkojë më tej se qeveria federale kur bëhet fjalë për kufizimin e aktiviteteve, transmeton albinfo.ch.

Të gjitha aktivitetet ose tubimet në hapësira puiblike, të hapura e të mbyllura, në Kantonin e Bernës mund të mbahen me praninë e maksimalisht 15 vetave.

Këshilli qeveritar shpreson që brenda dy ose tri javësh do të jetë në gjendje të vendosë për “lehtësimin e masave, për të rënë kështu në nivelin e masave të vendosura pak javë më parë në nivelin federal”.

---