Me lutje drejtuar Zotit, Serbia synon të ndalojë njohjen e Kosovës nga Greqia

Diplomati serb Selakoviq ka thënë se “nuk dëshiron të besoj” që Athina do të ndryshojë qëndrimin e saj të deritanishëm

Ministri i Jashtëm i Serbisë, Nikola Selakoviq, ka thënë se do t’i lutet Zotit që Greqia të mos e njohë Kosovën.

Në një deklarim për televizionin serb Prva, i pyetur rreth njohjes së mundshme të pavarësisë së Kosovës nga Greqia, Selakoviq ka thënë se “nuk dëshiron të besoj” që Athina do të ndryshojë qëndrimin e saj të deritanishëm.

Ai ka thënë se në takimet që ka me zyrtarët grekë, ata përsërisin se nuk do të ketë njohje të Kosovës, por shtoi se duke parë disa lëvizje të qeverisë greke, një gjë e tillë edhe mund të pritet.

“Dua të besoj se një gjë e tillë nuk do të ndodhë dhe do të luftoj dhe do t’i lutem Zotit që deri te ajo të mos vijë”, ka thënë Selakoviq, duke theksuar se edhe Serbia, edhe Greqia janë shtete ortodokse.

 

---