“Mesazhet e paqarta” të diplomacisë austriake kundrejt Kosovës dhe Bosnjës

Një muaj pasi ministrja e jashtme austriake Karin Kneissl vizitoi Bosnjën, ajo nga e hëna ndodhet për një udhëtim treditor në Kosovë, Maqedoni dhe Serbi. Sipas politologut Vedran Dzihic, përmes këtij udhëtimi shefja e dipomacisë vjeneze kërkon të forcojë interesat e Austrisë në rajon, shkruan “WZ”.

Ministrja e jashtme austriake Kneissl

Austria prej kohësh vlente si partner i besueshëm politik dhe ekonomik i shteteve të Ballkanit Perëndimor. Gjithashtu vendi alpik ka qenë i angazhuar disa herë në fushën e sigurisë të rajonit: Austria ka numrin më të madh të ushtarëve jashtë shtetit në Kosovë, 440 sosh. Por me ndryshimin e qeverisë vitin e kaluar ka “ardhur menjëherë deri te zërat kritikë,” thotë Dzihic.

Pasiguri kosovare ndaj deklaratave të Strache

Zv.kancelari Christian Strache në mes të shkurtit pati deklaruar se “Kosova padyshim është pjesë e Serbisë.” Më vonë ai kontestoi deklaratën. Gjithashtu gjatë vizitës së tij në Bosnjë, shefi i ekstremit të djathtë në Austri, bëri thirrje për pavarësi të Republika Srpska, përcjell albinfo.ch.

Shumë boshnjakë dhe kosovarë janë “akoma të paqartë”, se çfarë përfaqëson politika e jashtme austriake, vijon Dzihic. Në 13 prill do mbahet Konferenca për dhjetë vjetorin e marrëdhënieve mes Austrisë dhe Kosovës. Gjithsesi “ajo çfarë mbetet, janë shprehjet nga Strache”.

“Mesazhe të paqarta”

Kancelari Sebastian Kurz nga partia e djathtë ÖVP pati deklaruar se Ballkani Perëndimor është ndër prioritetet kryesore të politikës së jashtme austriake. Pikërisht këto janë “mesazhe të paqarta” drejtuar rajonit dhe se “testi i vërtetë” i Austrisë do jetë gjysmën e dytë të këtij viti kur merr udhëheqjen e Këshillit Europian, mendon Dzihic: Atje paraqitet 2018 si “vendi i shpresës për integrimin europian të Ballkanit”. Gjithashtu sepse udhëheqja e tanishme, Bullgaria, ka planifikuar një takim të lartë europian për në maj.

Ballkani perëndimor ka problemin e Kosovës, pavarësia e së cilës nuk njihet nga pesë shtete të BE dhe kontestin e emrit mes Maqedonisë dhe Greqisë. Por Dzihic nuk mendon se Austria mund të kishte përsëri një rol “proaktiv dhe projektues” të zgjidhjes së problemeve në Ballkanin Perëndimor.