Milenkoviq dyshohet për sulme ndaj institucioneve të Kosovës

Milun Milenkoviq, i njohur si “Llune”, e i cili u arrestua të martën nga Policia e Kosovës është i dyshuar për disa vepra penale.

“Llune” dyshohet se në grup me të dyshuar të tjerë ka organizuar sulmet ndaj objekteve të Komisioneve Komunale Zgjedhore me granata dore, sulmet ndaj zyrtarëve të KQZ-së dhe pjesëtarëve të Policisë së Kosovës.

Ai po ashtu dyshohet se ka sulmuar në disa raste të mitur, fëmijë shqiptarë, që jetojnë në Mitrovicën e Veriut, shkruan koha.net.

Mes tjerash dyshohet se ka pasur rol aktiv dhe ka qenë udhëheqës në barrikadat e shtatorit të vitit 2021 dhe së fundmi dyshohet se organizoi sulmet ndaj objekteve komunale, specifikisht në Zveçan, dhe sulmet ndaj pjesëtarëve të KFOR-it, që përfunduan me 30 ushtarë të plagosur, përcjell albinfo.ch.

Arrestimi i Milenkoviqit të martën në veri u përcoll me lëshim të alarmit. Gjatë aksionit për arrestimin e tij u lënduan lehtë tre policë të Kosovës.