Ministri Berset “u dhuron nga 5000 franga” nevojtarëve në fb

"Ka disa javë që hapen faqe dhe profile të reja të rreme në facebook, në emër të ministrit Alain Berset. Emrat ndryshojnë por mashtrimi është gjithmonë i njëjtë”

Një faqe e rreme që pretendonte të ishte e ministrit federal  të shëndetësisë, Alain Berset ka qëndruar së fundmi në internet për disa orë. Faqet e tilla tashmë nuk janë raste të izoluara.

Kjo më aktualja tregonte transmetimin e një fjalimi të mbajtur nga Berset në WEF, shkruan 20minuten.ch.

Pranë figurës së tij dukej një numër që nuk mund të identifikohej lehtë, transmeton albinfo.ch. Në këtë postim, përdoruesve u kërkohej të postonin numrin si koment nëse ata mund ta gjenin se cili ishte ai numër.

“Për shkak të pasojave nga koronavirusi, unë u jap para nevojtarëve. 700 njerëzit e parë që zbulojnë numrin e saktë në foto do të marrin 5000 franga zvicerane “cash” prej meje. FALEMINDERIT ?????”

Secilit nga ata që përmbushën këtë kërkesë, iu dërgua menjëherë në një mesazh.

Aty shkruante: “Urime për fitoren tuaj, ju keni të drejtë për 5,000 franga zvicerane. Tani ndiqni udhëzimet për marrjen e dhuratave”. Për ta bërë këtë, duhet të ndani lidhjen në faqen e Facebook në 5-10 grupe brenda 10 minutave të ardhshme…

“Fatkeqësisht, ky nuk është një rast i izoluar”, thotë Emma Brossin, zëdhënëse për media në Departamentin Federal të Punëve të Brendshme (EDI).

“Ka disa javë që hapen faqe dhe profile të reja të rreme në facebook, në emër të këshilltarit federal Alain Berset. Emrat ndryshojnë por mashtrimi është gjithmonë i njëjtë”, thotë Brossin, transmeton albinfo.ch.

“Ne e kontrollojmë këtë rregullisht dhe shpesh informohemi nga qytetarët. Ne i raportojmë llogaritë e tilla të rreme menjëherë në Facebook në mënyrë që ato të shlyhen. Kështu kemi vepruar edhe  në këtë rast”.

---