Ministri Buja në vizitë zyrtare në Zvicër

Ministri i Arsimit i Republikës së Kosovës, Ramë Buja zhvillon takime me zyrtarë të lartë të arsimit të Zvicrës dhe të kantonit të Gjenevës

Ministri i Arsimit në Qeverinë e Kosovës, Ramë Buja, po qëndron në Zvicër, ku ndodhet në një vizitë zyrtare me një delegacion të ministrisë që drejton. Gjatë këtij qëndrimi disaditësh, në agjendën e ministrit kosovar janë paraparë një sërë takimesh me autoritetet zvicerane të arsimit por edhe me komunitetin kosovar që jeton në Zvicër.

Kështu, sipas njoftimeve nga Ambasada e Kosovës në Bernë, ministri Buja do të takohet të mërkurën, më 8 qershor në Bernë me sekretarin e Ministrisë së Arsimit në nivel federal ndërsa po të njëjtën ditë ai do të ketë edhe një takim me ministrin e arsimit të kantonit të Gjenevës.

Sot, e martë, ministri Buja ka të paraparë një takim me kryesinë e “Kuvendit të Shqiptarëve të Zvicrës”, të themeluar ditë më parë dhe me atë të Fondacionit për Zhvillim të Kosovës që vepron në Bernë nga dhjetori i vitit të kaluar, njoftojnë burime nga ambasada e Kosovës.

Po ashtu ministri i arsimit i Kosovës do të marrë pjesë si mysafir special në kuvendin e punës të LAPSH-së që mbahet në Soloturn nesër, më 8 qershor.