Ministri Hoxhaj u prit nga kryediplomatja e Lihtenshtajnit, Aurelia Frick

Me ftesën e ministres së punëve të jashtme të Principatës së Lihtrenshtajnit, Aurelia Frick, sot për vizitë në Vaduz ishte ministri i jashtëm i Kosovës, Enver Hoxhaj.

“Krahas rezultatit të papritur zgjedhor në SHBA, në bashkëbisedimin e punës në mes të dy ministrave u prekën para së gjithash marrëdhëniet bilaterale në mes të dy vendeve, zhvillimi ekonomik dhe partneriteti i dy vendeve në sferën e migracionit”, thuhet në një komunikatë të lëshuar nga Qeveria e Lihtenshtajnit.

Më shumë se 1000 veta nga Kosova kishin ardhur gjatë viteve `90 në principatë, shkruan albinfo.ch. lihtenshtajni dhe Kosova kanë lidhur që nga viti 2002 një marrëveshje partneriteti në fushën e migracionit, në kuadrin e të cilës janë promovuar projekte për kthimin e refugjatëve në Kosovë.

Lihtenshtajni  eka njohur pavarësinë e Kosovës në vitin 2008 si vendi i 33-të në botë që ka njohur këtë realitet.

Kosova, krahas Moldavisë, është njëri ndër dy vendet ku Lihtenshtajni është më i fokusuar sa i përket bashkëpunimit humanitar dhe për zhvillim,  në Evropë.

Dy homologët kanë biseduar po ashtu edhe për përpjekjet që po bën Kosova për njohje të mëtejme dhe për pranim në organizatat ndërkombëtare, shkruan albinfo.ch. Në bashkëbisedimin Hoxhaj-Frick u bë fjalë edhe për situatën e përgjithshme të migracionit dhe refugjatëve në rajon.