Ministri zviceran: Vala e të nxehtit është pasojë e ndryshimeve klimatike

(KEYSTONE/Georgios Kefalas)

Ministri zviceran i Mjedisit, Albert Rösti, ka deklaruar se vala aktuale e të nxehtit është një shenjë e qartë e ndryshimeve klimatike, duke e cilësuar atë si një rrezik serioz për njerëzit dhe mjedisin, transmeton albinfo.ch.

Në një intervistë për radion publike SRF, Rösti theksoi se qytetet duhet të kenë më shumë hapësira të gjelbra dhe se kantonet e komunat duhet të investojnë më shumë në masa përshtatëse për t’u përballur me temperaturat ekstreme.

Ai shtoi se, megjithëse jo çdo fenomen ekstrem i motit lidhet drejtpërdrejt me krizën klimatike, vala aktuale e të nxehtit është një tregues i qartë i prirjeve afatgjata të ndryshimeve klimatike.

Ministri rikonfirmoi gjithashtu mbështetjen e qeverisë për zgjerimin e burimeve të energjisë së rinovueshme, por nënvizoi se edhe energjia bërthamore duhet të mbetet pjesë e strategjisë për të garantuar furnizim të qëndrueshëm me energji elektrike.

Deklaratat e Rösti vijnë në një kohë kur Evropa po përballet me një nga valët më intensive të të nxehtit të viteve të fundit. Shkencëtarët theksojnë se ngrohja globale e shkaktuar nga aktiviteti njerëzor po i bën ngjarje të tilla gjithnjë e më të shpeshta dhe më të rënda.