Ministrja Kumbaro fshin postimin pas urimit për emërimin e Liburn Aliut në krye të Portit të Durrësit

Ministrja e Arsimit e Shqipërisë, Mirela Kumbaro, ka fshirë një postim në Facebook, në të cilin kishte uruar Liburn Aliun për emërimin si drejtor i Portit të Durrësit.

Në postim ajo e kishte cilësuar emërimin e Aliut si “lajm të mirë”, duke theksuar rëndësinë e bashkëpunimit mes Shqipërisë dhe Kosovës përmes portit më të madh detar të vendit.

“Përherë e kemi thënë se Durrësi është porta e përbashkët drejt Adriatikut si për Shqipërinë ashtu edhe për Kosovën, prandaj nuk mund të kishte zgjedhje më të mirë për ta mishëruar këtë vizion e ndjesi sesa Liburni, një atdhetar dhe funksionar i sprovuar publik, me të cilin si ish-Ministre e Mjedisit kam pasur marrëdhënie të shkëlqyera bashkëpunimi gjatë kohës kur ai drejtonte sektorët e mjedisit dhe planifikimit hapësinor në Kosovë”, ka shkruar ajo, transmeton albinfo.ch.

Megjithatë, pak minuta pas publikimit, postimi u hoq nga profili i saj. Arsyet e fshirjes nuk janë bërë të ditura, ndërsa deri më tani asnjë zyrtar tjetër i Qeverisë Rama nuk ka reaguar lidhur me këtë emërim.

Ndryshe, Liburn Aliu ka mbajtur më parë postin e Ministrit të Infrastrukturës në Qeverinë e Kosovës, nga i cili dha dorëheqje pas zgjedhjes së Dimal Bashës në krye të Kuvendit të Kosovës.