Ministrja Rizvanolli intervistohet nga Prokuroria Speciale

Dorëzohet kallëzim penal edhe ndaj ministres Arbërie Nagavci

Ministrja e Ekonomisë, Artane Rizvanolli, po merret në pyetje në Prokurorinë Speciale të Kosovës, ka konfirmuar Prokuroria të martën.
Në njoftimin për media thuhet se ajo po intervistohet në cilësinë e dëshmitares.
“Prokuroria Speciale informon se sot, ministrja Artane Rizvanolli, është paraqitur në Prokurorinë Speciale me ftesë të kësaj prokurorie. E njëjta është duke u intervistuar në cilësinë e dëshmitares për një çështje penale, të cilën kjo prokurori e ka në hetim”, thuhet në komunikatë.
Ministrja Rizvanolli nuk është deklaruar për media pas intervistimit nga Prokuroria Speciale.
Avokati i saj, Artan Qerkini, tha se kanë paralajmërim nga Prokuroria që nuk mund t’i shpalosin detajet e hetimit.

Dorëzohet kallëzim penal edhe ndaj ministres Arbërie Nagavci
Deputetët opozitarë kanë dorëzuar kallëzim penal ndaj ministres së Arsimit, Arbërie Nagavci. Kallëzimi u dorëzua të martën në Prokurorinë Speciale nga anëtarët e Komisionit Hetimor për Tekstet Shkollore, me arsyetimin se subvencionimi i teksteve shkollore nga MASHTI ka shkelje ligjore.
Kryetari i Komisionit, Shemsedin Dreshaj, ka thënë se raporti final ka mjaft të gjetura të shkeljes procedurale, shkeljeve ligjore dhe ka bazë për hetim të mëtejmë nga Prokuroria.
“Komsioni hetimor për funksionimin e teksteve shkollore për vitin 2023/24, ka punuar me mandat nga Kuvendi i Republikës së Kosovës, ka përmbyllur një proces të intervistimit në prani të ekspertëve të emëruar nga ana e mazhorancës dhe nga ana e opozitës dhe ky proces është përmbyllur me një raport final, i cili ka mjaft të gjetura të shkeljes procedurale, të shkeljeve ligjore dhe ka bazë për hetim të mëtejmë prokurorial lidhur me përgjegjësinë e individëve që janë marrë me këtë proces”, ka thënë ai.
Deputeti i PDK-së Ardian Kastrati, ka thënë se ministrja Arbërie Nagavci si udhëheqëse e këtij procesi, ministri Hekuran Murati, si përgjegjës i financave, si dhe kryeministri Albin Kurti, si shef i tyre, duhet të rrëfehen në Prokurorinë Speciale.
“Në këtë raport shkruhet që ka shkelje ligjore në procesin e subvencionimit të teksteve. Ka keq menaxhim dhe keq planifikim dhe pasoja të mëdha. Në cilësinë e procesit mësimor vitin e kaluar ku madje ka përfunduar viti dhe shumë nxënës nuk i kanë marrë librat deri në fund. Përveç kësaj është ndikuar edhe në transaksione të ndryshme, ku ka mundësi që dikush i ka marrë të hollat, e që jeton jashtë shtetit për shkak se është në ‘e Kosova’ nuk i ka fëmijët fare këtu në shkollë. Kanë marrë të hollat nga subvencioni. Kjo ka ndikuar edhe me transfer të linjave buxhetore siç është nga digjitalizimi që është cilësuar si shtylla e reformës në arsim. Mbi të gjitha janë dy pasoja kryesore të cilat për mua konsumojnë edhe elemente të veprës penale. E para është që në komisionin hetimor ata nuk kanë arritur të arsyetojnë se ku kanë mbetur 6 milionë euro diference. Nga 4 milionë të planifikuara ata i kanë harxhuar 11 milionë në vitin e kaluar. Përveç kësaj nxënësit nga klasa 6-9 nuk i kanë marrë fare librat. Nagavci si udhëheqëse e këtij procesi, Murati si përgjegjës që i kanë shpenzimet financiare dhe Kurti si shef i këtyre të parëve duhet të rrëfehen te prokuroria speciale”, ka thënë ai.
Anëtari i këtij komisioni hetimor, Agim Veliu, ka deklaruar se nëpërmjet subvencionimit ka pasur tejkalim të buxhetit dhe shpenzime më të mëdha të parasë.
“Kjo është vërtetuar edhe me procesin e intervistimit të dëshmitarëve që janë paraqitur para komisionit. Është fat i mirë që një grup i ekspertëve e ka hartuar një raport me të gjetura reale dhe këtë raport ne sot e dorëzojmë në Prokurorinë Speciale”, ka shtuar Veliu, njëherit deputet i LDK-së.
Sivjet ka qenë hera e dytë që Ministria e Arsimit ka subvencionuar blerjen e teksteve shkollore.
Kjo ishte bërë me arsyetimin që të mos ketë keqpërdorim të parasë publike.
Viteve paraprake MASHTI siguronte tekstet shkollore dhe i dorëzonte nëpër shkolla.

---