Multimilioner për pak orë

Një klient i një banke të Hesenit, Gjermani, për disa orë ka jetuar në lëkurën e multimilionerit. Pasi që në konton e njeriut “fatlum” ishin derdhur papritur plot 200 milionë euro, ai nuk i përballoi joshjes dhe shkarkoi “vetëm” 10 milionë euro.

Por gëzimi i milionerit pati jetë të shkurtër, vetëm disa orë. Banka e pa shpejt se kishte bërë gabim teknik prej disa zerosh dhe e përmirësoi gabimin.

Kështu, përveç që u detyrua të kthejë të hollat, fituesit i duhet të paguajë edhe kamatën që i caktoi banka. Kjo kamatë është 14.4 për qind, që i bie 12.000 euro. Por klienti ka ngritur padi dhe synon që të marrë prapa së paku kamatën.

Sipas një vendimi që kishte marrë më parë Gjykata Federale e Gjermanisë në një rast të ngjashëm, klienti i bankës nuk është i detyruar të njoftojë bankën për gabimet që bën ajo. Ai, në rastin e përmendur, vetëm ka shfrytëzuar situatën e krijuar.