NATO: Vendimi për hapjen e Urës së Ibrit duhet të merret në dialog

NATO Kosovo Force - KFOR @NATO_KFOR, X

NATO ka thënë se vendimi për hapjen e Urës së Ibrit në Mitrovicë duhet të merret përmes dialogut dhe në koordinim me komunitetin ndërkombëtar.

Ky qëndrim u bë i ditur gjatë takimeve të veçanta të martën në Bruksel ndërmjet kryenegociatorëve të Kosovës dhe Serbisë, Besnik Bislimi dhe Petar Petkoviq, në prani të ndihmës sekretarit të Përgjithshëm të NATO-s për Operacionet, Tom Goffus, dhe komandantit të operacioneve civile të Shërbimit të Veprimit të Jashtëm të Bashkimit Evropian, Stefano Tomatin, raporton telegrafi, përcjell Albinfo.ch.

Sipas njoftimit të NATO-s, gjatë takimit, Goffus diskutoi situatën e sigurisë në Kosovë, duke përmendur shqetësimet në lidhje me hapjen e mundshme të urës për trafikun rrugor.

Ai theksoi se vendimet në këtë drejtim duhet të jenë gjithëpërfshirëse dhe të qëndrueshme.

“Vendimet duhet të merren përmes dialogut, në koordinim të kohës dhe në mënyrë efektive me Komunitetin Ndërkombëtar, dhe duhet të sigurojmë që të mos rrezikohet siguria e komuniteteve lokale apo e trupave të NATO-s,” deklaroi Goffus.

Ai shtoi se NATO, përmes misionit të KFOR-it, është e përkushtuar për të përmbushur mandatin e saj të OKB-së, duke siguruar një mjedis të sigurt dhe të qetë për të gjithë.

“Misioni i KFOR-it është i detyruar nga mandati i tij i OKB-së për të adresuar çdo shqetësim të sigurisë dhe për të siguruar një mjedis të sigurt dhe të qetë,” tha Goffus.

Ndërsa KFOR-i vazhdon të ruajë një prezencë të qëndrueshme në urë dhe të kryejë patrullime të rregullta në zonat përreth, Goffus rikonfirmoi mbështetjen e plotë të NATO-s për dialogun e ndërmjetësuar nga Bashkimi Evropian për normalizimin e marrëdhënieve ndërmjet Kosovës dhe Serbisë.

“Kjo kornizë e dialogut është kyçe për zgjidhjen e çështjeve të pazgjidhura dhe për arritjen e një zgjidhjeje që respekton të drejtat e të gjitha komuniteteve, duke qenë thelbësore për sigurinë e qëndrueshme në Kosovë dhe për stabilitetin e gjithë Ballkanit Perëndimor,” përfundoi Goffus./Albinfo.ch/