Nazim Rexhepi fiton sërish në Langnau

Nazim Rexhepi përsëri ka fituar në zgjedhjet si këshilltar në Komunën e Langnaus, duke fituar për mandatin e katërt në këtë Komunë.

Ka qenë vetë Rexhepi, i cili ka njoftuar se ka triumfuar. “I falënderoj votuesit e mi. Edhe për katër vite sot fitova zgjedhjet për mandatin e katërt në komunën e Langnaus”, ka thënë ai për albinfo.ch.

Ai që disa dekada merret me politikë. “Prej vitit 1993 jam fillimisht simpatizues, e që nga viti 2004 anëtar i Partisë Socialdemokrate të Zvicrës. Më 3 nëntor 2013 me 715 vota të qytetarëve të Langnaut u zgjodha për herë të tretë (2006 – 2009; 2010 – 2013 dhe 2013 -2017) anëtar i Asamblesë Komunale të Langnaut, kurse tani për herë të katërt. Në këto vite jam angazhuar jashtëzakonisht shumë në temat e mirëqenies sociale dhe të integrimit. Mendoj se ia kam dalë të ndikoj në përmirësimin e imazhit të emigrantëve në përgjithësi dhe të shqiptarëve në veçanti”, është shprehur Rexhepi për albinfo.ch.

Nazim Rexhepi është me origjinë nga Malisheva e Gjilanit. Më 1989 ka emigruar në Zvicër. Prej vitit 1990 është anëtar aktiv i sindikatave zvicerane, ndërsa që nga viti 2004 është i punësuar si sekretar sindikal në Sindikatën UNIA. Aktualisht vepron dhe jeton në po të njëjtin qytet së bashku me familje.