Ndalohet importi i mishit të pulave nga BE

Pas njoftimit se mishi dhe vezët e pulës nga Gjermani, Britania dhe Holanda, mund të jenë prekur nga një virus i rrezikshëm, Maqedonia ndali importin nga këto vende

Autoritetet e Maqedonisë kanë vendosur një masë të përkohshme për ndalimin e importit të mishit të pulës dhe vezëve nga Holanda, Gjermania dhe Britania e Madh. Vendimi pason njoftime për mundësinë e prekjes së këtyre vendeve nga një lloj i ri i gripit të shpendëve që përcillet edhe tek njerëzit.

Këtë ndalesë e ka marrë mbrëmë Qeveria e Maqedonisë përmes Agjencisë qeveritare për Veterinari dhe Ushqime.

“Mbikëqyrja e paraqitjes së këtij virusi në vend po bëhet në bazë të ligjit për veterinari dhe shëndetësi. Pas analizave të bëra në vendin tonë deri tani nuk është regjistruar prania e këtij gripi tek shpezët, por jemi duke ndjekur edhe udhëzimet e Komisionit Evropian lidhur me parandalimin e ndikimit të këtij gripi”, citon INA njoftimin e Agjencisë për Veterinari dhe Ushqim.. 

Andaj kjo agjenci, ka vendosur ndalesën e përkohshme të importit të mishit të pulës dhe prodhimeve të tjera të pulës nga tre vendet si Holanda, Gjermania dhe Britania e Madhe.

Komisioni Evropian, siç thuhet më tej, ka zbatuar ndalesë të përkohshme transporti të shpendëve, por duke përfshirë vetëm tregjet e brendshme, ndërsa pritet që në Evropë të ndërmerren masa parandaluese që do t’i përfshijnë zonat kritike ku gjenden fermat e shpendëve.

Këtyre fermave do t’u ndalohet shitja e çfarëdolloj prodhimi nga pula në vende të tjera anëtare të BE-së dhe në vende të treta.