Ndërhyn për t`i pajtuar, plagoset kosovari

Sulmuesi është arrestuar dhe ndaj tij është ngritur padi për kërcënim të rrezikshëm dhe për sulm me qëllim shkaktimin e rrezikut për jetë

Dy vëllezër bien në konflikt me një biznesmen lidhur me një riparim me gabime që ky i fundit kishte bërë në laptopin e tyre. Njëri prej vëllezërve nxjerr papritmas thikën dhe plagos një kosovar që ndodhej aty, i njohur i biznesmenit. Ai vetëm po provonte t`i qetësonte gjakrat në mes të dy palëve, njofton policia.

Ngjarja ka ndodhur në Graz, Austri, kur dy vëllezërit, egjiptianë 20 dhe 21 vjeç kishin shkuar në lokalin e celularëve për tu ankuar për laptopin e tyre të riparuar keq. Pronari i lokalit, ishte një turk 27 vjeçar. Pasi që zënka fillon të përshkallëzohet, një i njohur i turkut, kosovar 45 vjeç që ndodhej rastësisht aty, përpiqet të ftohë gjakrat në mes të palëve në konflikt. Por egjiptiani e theri katër herë me thikë burrin 45 vjeçar, duke i shkaktuar prerje në dorën e majtë.

Sulmuesi është arrestuar dhe ndaj tij është ngritur padi për kërcënim të rrezikshëm dhe për sulm me qëllim shkaktimin e rrezikut për jetë.

Kosovari ka pasur një trajtim ambulator të plagës.