Nderohen me diploma për promovimin e vlerave shqiptare

Me diplomat e nderit "Personalitet i frankofonisë" për vitin 2013 janë nderuar: Viktor Rufi (Victor Ruffy), Albana Krasniqi-Malaj dhe Elina Duni

Ministria e Punëve të Jashtme e Republikës së Shqipërisë nderoi me diplomën e nderit Personalitet i frankofonisë për vitin 2013  tre emra të njohur frengjishtfolës që jetojnë e punojnë në Zvicër. Diplomat, të nënshkruara nga ministri i punëve të jashtme, jepen sipas propozimit të ambasadës së Shqipërisë ne Bernë. Motivacioni i tyre është për ndihmesën e çmueshme dhe kyçjen e pandërprerë në promovimin e vlerave  të kulturës e të frankofonisë shqiptare, thuhet në një skomunikatë të dërguar nga Ambasada e Republikës së Shqipërisë në Bernë.

Me këtë titull është vlerësuar z. Viktor Rufi, (Victor Ruffy) politikan në pension dhe veprimtar  i shquar zviceran, anëtar parlamenti (disa herë) dhe kryetar i Këshillit Kombëtar të Zvicrës si dhe anëtar i Asamblesë Europiane. Mik i afërt i shqiptarëve, z. Rufi është shquar sidomos në krye të shoqatës Eurobibus, e cila për njëzet vjet rresht ka dërguar qindramijë franga ndihma në Shqipëri, të përcaktuara sidomos për shkollat e bibliotekat në Tiranë e në disa rrethe. Më përpara është nderuar me mirënjohjen Qytetar Nderi i Fushë Krujës. Eurobibus krijoi edhe shumë lidhje e miqësi të qëndrueshme, që ndihmojnë për shkëmbimin e vlerave ndërmjet shqiptarëve e zviceranëve.

Zonja Albana Krasniqi – Malaj  është një tjetër veprimtare që u nderua me të njëjtën diplomë. Në cilësinë e kordinatores së Universitetit Popullor Shqiptar të Gjenevës, por edhe më përpara, ka dhënë e jep ndihmesë të çmueshme për integrimin e shqiptarëve në shoqërinë zvicerane, duke ruajtur në të njëjtën kohë vlerat kombëtare dhe lidhjet me trojet nga e kanë prejardhjen.

Këngëtarja Elina Duni tashmë është emër i njohur jo vetëm për artdashësit zviceranë. Me talentin muzikor e zërin e ëmbël, ka bërë të njohura këngët e bukura shqiptare, të përpunuara  e të përshtatura për xhaz.  Koncertet e saj mbushin sallat, duke tërhequr gjithnjë e më shumë dashamirë të kësaj muzike. Ndihmesa e saj në fushën e artit është vlerësuar disa herë edhe në median zvicerane, përfundon komunikata e Ambasadës së Shqipërisë në Bernë.