Ndërpritet pranimi i ukrainasve në Qendrën Federale të Azilit në Cyrih

Aktualisht ka një ndërprerje të pranimit dhe do të regjistrohen vetëm personat që nuk kanë ende strehim. Të tjerëve u kërkohet të regjistrohen një ditë tjetër

Shumë gra, fëmijë dhe në mes tyre edhe disa burra, të gjithë nga Ukraina janë ende duke pritur në radhë para Qendrës Federale të Azilit në Cyrih. Shumica prej tyre tashmë kanë gjetur strehim dhe janë këtu për t’u regjistruar për statusin e mbrojtjes “S”, shkruan sda.ch.

Një punonjës i atyshëm thotë se aktualisht ka një ndërprerje të pranimit dhe do të regjistrohen vetëm personat që nuk kanë ende strehim. Të tjerëve do t’u kërkohet të regjistrohen në një datë të mëvonshme.

Të hënën në mëngjes, Sekretariati Shtetëror për Migracionin (SEM) ka raportuar se 3,843 ukrainas kanë marrë tashmë statusin e mbrojtjes S, përcjell albinfo.ch. Me këtë status ata  mund të qëndrojnë një vit në Zvicër, të punojnë dhe të shkojnë në shkollë. 2,281 janë akomoduar në qendrat federale të azilit, 1,562 në akomodime private.

45,000 shtretër janë tani në dispozicion në akomodime private në Zvicër, plus 5,000 shtretër në hotele dhe ndërtesa të tjera të papërdorura. “Schweizerische Flüchtlingshilfe” (SFH) siguron që strehimi t’u përshtatet refugjatëve – dhe të jetë i sigurt.

---