Ndërpritet testimi për vaksinën kundër covid-19 pasi që sëmuret një i testuar

Për shkak të sëmurjes së një personi që po testohej, kompania farmaceutike AstraZeneca ndalon testet e vaksinës në fazën e fundit

Kompania farmaceutike britanike AstraZeneca ka ndërprerë studimin klinik për vaksinën e saj kundër koronavirusit. Këtë e ka bërë si një masë paraprake pasi që një pjesëmarrës u sëmur gjatë testimit, shkruan srf.ch.

Kompania britanike ka njoftuar se ndërprerja ishte një masë rutinë për raste të tilla, transmeton albinfo.ch. Kështu, rasti duhet të hetohet nga një komitet i pavarur.

Rishikimi ka të bëjë me përcaktimin nëse problemet shëndetësore janë shkaktuar nga vaksina ose kanë ardhur pavarësisht nga ajo.

Koncerni farmaceutik me këtë rast flet për një “sëmundje potencialisht të pashpjegueshme”. AstraZeneca shkruan më tutje se në seritë e mëdha të eksperimenteve është e pritshme që të paraqiten sëmundje tek të testuarit, përcjell albinfo.ch. Por këto duhet të kontrollohen në mënyrë të pavarur dhe me kujdes.

Vaksina e mundshme për të cilën po bëheshin testimet është zhvilluar nga Universiteti i Oksfordit dhe aktualisht është në fazën e fundit të studimit. Dhjetëra mijëra persona janë duke marrë pjesë në testime.

---