Ndryshohen procedurat nga Ambasada Gjermane për viza pune

Ambasada e Gjermanisë në Prishtinë ka njoftuar se ka ndryshuar procedurat për kosovarët që duan viza pune.

Me anë të një njoftimi për media, bëhet e ditur se në vizat e punës për Gjermani nga 1 nëntori ka filluar të bëhet një dallim mes punësimit sipas Rregullores së Punësimit 26 neni 2 dhe fillim të punësimit tjetër kualifikues (kartoni i kaltër i BE-së, aftësim, etj.).

“Nga tani bëhet një dallim ndërmjet punësimit sipas Rregullores së Punësimit 26 neni 2  (Rregullorja për Ballkanin Perëndimor) dhe fillim të punësimit tjetër kualifikues (kartoni i kaltër i BE-së, aftësim, etj.). Ju lutemi sigurohuni që të zgjidhni kategorinë e duhur. Për fat të keq, nëse e keni parashtruar kërkesën në kategorinë e gabuar, ne duhet të refuzojmë hyrjen në zyrën e vizave”, thuhet në njoftim, shkruan ‘Insajderi’.

Ambasada e Gjermanisë ka njoftuar deri më tani është rekomanduar që për parashtrim të kërkesës për vizë për fillim të punësimit sipas Rregullores së Punësimit 26 neni 2, të kërkoni paraprakisht lejen e punës  në Agjencinë Federale të Punës, përcjell albinfo.ch.

Ambasada e Gjermanisë ka njoftuar po ashtu se “parapëlqimet e lëshuara prej autoriteteve gjermane deri më 1 nëntor 2017 mbeten të vlefshme, por ato nuk trajtohen me prioritet gjatë caktimit të termineve”.