Në Bernë u protestua kundër ligjit të ri për azilin

Ndryshimet e reja të ligjit mbi azilin i ka kritikuar edhe e ngarkuara me të drejtat e njeriut në OKB, Navi Pillay

Disa qindra protestues kanë shprehur dje në Bernë mospajtimin e tyre me ligjin e ashpërsuar të azilit. Ky ligj është miratuar me votat e shumicës në Dhomën Nacionale të Parlamentit të Zvicrës.

Protestuesit janë shprehur sidomos kundër vendimit që azilkërkuesve tu ndalohen ndihmat sociale dhe tu jepen vetëm ndihmat emergjente. Vendimi tjetër, që dezertimi nga ushtria të mos merret si bazë për azil, është quajtur “vendim çnjerëzor” nga protestuesit në Bernë. Po ashtu ata janë shprehur edhe kundër asaj që azilkërkuesit në Zvicër të mos kenë të drejtë të merren me politikë.

Për pjesëmarrje në këtë protestë kishin apeluar një numër i madh organizatash, partishë, sindikatash dhe kishash.

Ndryshimet e vendosura të ligjit mbi azilin i ka kritikuar edhe e ngarkuara me të drejtat e njeriut në OKB, Navi Pillay. Në bisedë me ministrin Didier Burkhalter, Pillay ka tërhqur vërejtjen që azilkërkuesit duhet të trajtohen si njerëz dhe jo thjesht si problem kufijsh dhe sigurie.