Në Davos, Trump pritet të mbajë fjalimin më të ndjekur në WEF

Qasja e kufizuar, Trump flet përballë delegatëve kryesorë në Davos

Presidenti i Shteteve të Bashkuara, Donald Trump, pritet të mbajë së shpejti fjalimin e tij në Forum Botëror Ekonomik (WEF) në Davos, një nga ngjarjet më të ndjekura të forumit, përcjell albinfo.ch.

Në fjalimet e tjera të ditës, Presidenti francez Emmanuel Macron kritikoi tarifat amerikane, duke i quajtur ato “thelbësisht të papranueshme, veçanërisht si një mjet për të ushtruar presion.” Ndërsa Presidentja e Komisionit Evropian, Ursula von der Leyen, theksoi mundësitë që Evropa ka për t’u përballur me sfidat gjeopolitike.

Presidenti zviceran Guy Parmelin në fjalimin e tij për WEF-theksoi rëndësinë e unitetit dhe të marrëdhënieve ndërkombëtare.

Qasja në fjalimin e Trump është shumë e kufizuar, duke lejuar vetëm pjesëmarrësit kryesorë të forumit në sallën e kongresit. Parashikohet që rreth një mijë vende të lira të zihen vetëm nga delegatët më të rëndësishëm.

Helikopteri i presidentit amerikan u ul në Davos në orën 14:00, ndërsa njerëzit filluan të grumbulloheshin para sallës së kongresit për të ndjekur fjalimin e tij, i cili është planifikuar të fillojë në orën 14:30.

---