Në Ditën e Refugjatëve promovohet futbolli si mjet për integrim

Është mbajtur turniri i futbollit “të rrugës” në të cilin kanë luajtur personalitetet prominente të Zvicrës kundër refugjatëve. Ky turnir në fakt paraqet fillimin e një projekti javor përmes të cilit synohet promovimi i integrimit përmes futbollit

Keystone

Të shtunën, më 18 qershor, që është dita nacionale e Zvicrës kushtuar refugjatëve, në sheshin kryesor të Bernës Bundesplatz është organizuar një manifestim i larmishëm. Në këtë organizim kanë qenë të pranishme organizata të ndryshme të cilat në stendat e tyre kanë ofruar informacione mbi veprimtarinë e tyre që ka të bëjë me refugjatët.

Po ashtu kishte ushqime nga kuzhina të vendeve të ndryshme të botës.

Ndërsa më interesantja ka qenë turniri i  futbollit “të rrugës” në të cilin kanë luajtur personalitetet prominente të Zvicrës kundër refugjatëve. Ky turnir në fakt paraqet fillimin e një projekti javor përmes të cilit synohet promovimi i integrimit përmes futbollit. Përveç organizatës për mbrojtjen e refugjatëve “Flüchtlingshilfe” në këtë projekt merr pjesë edhe Liga Futbollistike e Zvicrës dhe një numër klubesh profesioniste të futbollit.

Kampionati Evropian i Futbollit i cili është duke u zhvilluar aktualisht ka shërbyer si një motiv shtesë për organizimin e këtij turniri.

Duke folur në emrin e Sekretariatit të Shtetit për Migracion (SEM), sekretari Mario Gattiker me këtë rast ka thënë se “angazhimi i klubeve të futbollit çon drejt takimeve dhe këmbimeve, të cilat si refugjatëve ashtu dhe shoqërisë zvicerane u sjellin vetëm të mira”.

Në mesin e personaliteteve të njohura që kanë marrë pjesë në turnirin e futbollit të rrugës ka qenë edhe ish futbollisti i famshëm i Nati-t zviceran, Stephane Chapuisat.

18 qershori është shpallur ditë nacionale e refugjatëve në Zvicër, në vitin 1980.