Kosova

Në Cyrih jepet premiera botërore e filmit “La Beauté de l’Âne” të Dea Gjinovcit

Filmi dokumentar i metrazhit të gjatë, me tematikë nga realiteti në Kosovën e pasluftës, merr pjesë në konkurrencë zyrtare të Festivalit ZFF, në Cyrih

E enjte, 25 Shtator 2025 - 12:20 albinfo.ch

Filmi “La Beauté de l’Âne”, realizim i regjisores së re shqiptare-zvicerane Dea Gjinovci ka premierën botërore nesër, më 26 shtato në festivalin ZFF (Zürich Film Festival) që po mbahet në Cyrih. Fjala është për një film dokumentar të metrazhit të gjatë, i cili merr pjesë në konkurrencë zyrtare, për çmim, në këtë festival prestigjioz.

Ky film me një titull të pazakonshëm – “La Beauté de l’Âne” dmth “Bukuria e gomarit” – temën e merr nga realiteti në Kosovën e pasluftës së fundit. Platforma mediale albinfo.ch është partnere e ekipit për promovimin e filmit, i cili në kinematë e Zvicrës do të fillojë të shfaqet nga 18 marsi 2026.

Në vazhdim, përmbajtja e shkurtër e filmit.

Regjisorja Dea Gjinovci dhe babai i saj, i cili ka jetuar në mërgim në Gjenevë për gjashtëdhjetë vjet, kthehen në fshatin e tij të lindjes, Makermal, në Kosovë. Fshati është shkatërruar në luftë dhe e tëra që ka mbetur janë historitë e fshatarëve që mbijetuan. Është një komunitet i qëndrueshëm, dhe e tillë është edhe historia e tij. Së bashku me këta njerëz, regjisorja dhe babai i saj nisin një kërkim për të gjetur të dhëna prapa në kohë, duke ringjallur kujtimet e fëmijërisë së babait të saj për Kosovën në vitet 1950. Ata bëjnë zbulime tronditëse, por shumë gjëra mbeten pa përgjigje, siç është zhdukja misterioze e gjyshes së Deas. Me dokumentarin e saj, Dea Gjinovci demonstron rëndësinë e rivlerësimit të historisë.

Regjisorja e re Dea Gjinovci është ftuar në festivale të shumta ndërkombëtare filmi me filmin e saj të parë të metrazhit të gjatë, RÉVEIL SUR MARS (trailer), duke përfshirë Festivalin e Filmit Tribeca në NYC dhe CPH:DOX në Kopenhagen. Filmi i saj i dytë i gjatë, i pritur me padurim, pra, filmi “La Beauté de l’Âne”, do të festojë premierën e tij botërore në Festivalin e Filmit në Cyrih.

Dea Gjinovci ka studiuar për Ekonomi dhe Politikë në SOAS në Londër si dhe për shkenca në Paris. Ka kryer master për Antropologji dhe Film Dokumentar. Ajo është prodhuese e regjisore filmash dhe është vlerësuar me disa çmime për punën e saj. Qendra e saj e jetesës është në Paris dhe në Gjenevë, shkruan albinfo.ch.