Në Zvicër tash e tutje mund të testohen 7000 veta në ditë për koronavirus

Në gjendjen aktuale, Zvicra, me 5800 mostra për milion banorë, ka një nga nivelet më të larta të testimit në botë

Zvicra duket se ka zgjeruar aftësinë e saj të testimit për infeksionin Covid 19. Kështu, tashmë 7,000 njerëz mund të testohen për koronavirus çdo ditë, ka shkruar sot gazeta “NZZ am Sonntag”, duke u bazuar në informacionet nga Zyra Federale e Shëndetit Publik (BAG).

Gjithsej deri më tani janë testuar mbi 50,000 mostra. Kjo sigurisht ka lehtësuar krizën fillestare, transmeton albinfo.ch. Në gjendjen aktuale, Zvicra, me 5800 mostra për milion banorë, ka një nga nivelet më të larta të testimit në botë.

Megjithatë, ka pasur shpesh ankesa nga njerëz që kanë dashur t`i nënshtrohen testit por që nuk u është mundësuar.

Të hënën, shefi i Organizatës Botërore të Shëndetit Tedros Gebreyesus u ka kërkuar vendeve anembanë botës të testojnë më shumë njerëz për virusin e koronës.

---