Nestreti, njëri ndër “100 ambasadorët e integrimit” në Austri

Nestreti ka kohë që angazhohet për bashkëjetesën. Ai është kryetar i këshillit të qytetit për të huajt dhe zëvendës këshilltar i komunës

Krahas personaliteteve të njohura publike me prejardhje të huaj si Arabella Kiesbauer, Kelly Kainz, Ivica Vastic e të tjerë, në mesin e 100 “ambasadorëve të integrimit” në Austri bëjnë pjesë edhe “vdekatarë të zakonshëm. Nestret Krasniqi nga Kosova është njëri prej tyre.

“Ambasadorët” i ka përzgjedhur sekretari shtetëror për integrim i Austrisë, Sebastian Kurz, në kuadrin e fushatës “Zusammen Österreich” (Së bashku Austri). Fushata ka për qëllim që të migrantët që janë integruar suksesshëm të vizitojnë 25 shkolla të ndryshme ku do të luftojnë paragjykimet dhe do të rrisin motivimin.

 © Nestret Krasniqi

Nestret Krasniqi jeton në qytetin Spittal të republikës Oberkärnten. Ai është i vetmi “ambasador” i zgjedhur nga kjo republikë. Nestreti është 38 vjeç. Nga Kosova në Austri ka ardhur në vitin 1995 ndërsa tri vite më vonë ka sjellë edhe gruan dhe fëmijët Doruntina dhe Duri. Djali më i vogël. Argoni, është i lindur në Austri, në vitin 2000.

Të kujtojmë se djali i tij, Duri Krasniqi qe bërë i njohur me suksesin që pati arritur në vitin 2008 duke u plasuar në finalen e spektaklit për yllin gjerman të muzikës.

“Në fillim nuk e dija asnjë fjalë gjermanisht. Me kohë unë kam bërë tashmë një përvojë shumëvjeçare si inxhinier i makinerisë në ndërmarrjet e vendit dhe të huaja”, thotë Nestreti.

Në qytetin Spittal ku jeton, Nestreti ka kohë që angazhohet për një bashkëjetesë të mirë. Ai është kryetar i këshillit të qytetit për të huajt dhe zëvendës këshilltar i komunës.