Netanyahu armatos popullin pas përshkallëzimit të situatës në Palestinë

Kryeministri Benjamin Netanyahu ka njoftuar planet për ta bërë më të lehtë për izraelitët marrjen e armëve të zjarrit mes përshkallëzimit të dhunës në territorin e pushtuar palestinez, një veprim që shihet si “dënim kolektiv” dhe që mund të rrisë më tej dhunën.

Netanyahu e njoftoi masën pasi thirri një takim të kabinetit të tij të sigurisë, të mbushur me politikanë të linjës së ashpër, pas një sulmi në Jerusalemin Lindor të pushtuar, ku u vranë shtatë persona nga të shtënat jashtë Sinagogës së Jeruzalemit Lindor të premten, transmeton cnn, përcjell albinfo.ch.

Të shtënat e fundjavës ndodhën në fund të një muaji të konfrontimit në rritje dhe pas një sulmi izraelit në qytetin e pushtuar të Bregut Perëndimor të Jeninit që vrau nëntë palestinezë dhe shkëmbimeve të zjarrit midis Izraelit dhe Gazës.

Në total, forcat izraelite kanë vrarë 32 palestinezë këtë muaj. Të shtunën, Netanyahu premtoi të përshpejtojë lejet e armëve për qytetarët izraelitë dhe të shtojë përpjekjet për të mbledhur “armë të paligjshme”.

Zyra e tij më vonë tha se përfitimet e sigurimeve shoqërore për familjet e sulmuesve do të anulohen gjithashtu. Përveç kësaj, ajo premtoi hapa të rinj për të “forcuar” vendbanimet ilegale izraelite në Bregun Perëndimor të pushtuar, por nuk dha detaje.