Nga Maqedonia e Veriut në Zvicër: Histori migrimi

@pixabay

Shoqata Zusammen in Zuchwil nis një seri të re aktivitetesh kushtuar historive të migracionit, me temën “Auswandern aus Nordmazedonien in die Schweiz”. Takimi informues do të mbahet më 5 shtator 2025, ora 19:00, në Widitreff, Widistrasse 27, Zuchwil.

Në këtë mbrëmje, Fisnik Zyberi, me rrënjë familjare nga rajoni i liqenit të Ohrit, do të ndajë rrugëtimin e tij personal dhe kërkimin shkencor mbi emigrimin nga ky rajon drejt Zvicrës. Zyberi ka punuar si mësues në shkollën Pisoni në Zuchwil (2018–2021), ndërsa më pas ka kryer studime në histori dhe gjeografi, me fokus në migracionin nga Maqedonia e Veriut. Aktualisht ai ndjek studimet master në historinë e Evropës Lindore.

Qëllimi i serisë së re të aktiviteteve është të sjellë rrëfime të sinqerta dhe personale të migrantëve, por edhe perspektiva nga ekspertë të fushës së kërkimit, politikës dhe praktikës mbi migracionin, integrimin dhe shoqërinë. Organizatorët theksojnë rëndësinë e dialogut dhe bashkëkuptimit për forcimin e kohezionit shoqëror.

Aktiviteti është i hapur për të gjithë të interesuarit, pa nevojë regjistrimi paraprak. Pjesëmarrja është falas, ndërsa në fund të takimit pjesëmarrësit do të ftohen në një aperitiv miqësor.

2025-09-02_Nordmazedonien_Zuberi