Ngjitet në 373 numri i të vdekurve nga koronavirusi në Zvicër

Sipas të dhënave të BAG, në mesditën e të martës numri i rasteve të konfirmuara me këtë sëmundje është ngjitur në 16.176, që është 701 më shumë se një ditë më parë

Vazhdon të rritet numri i të infektuarve dhe të vdekurve nga Covid-19 në Zvicër dhe në Principatën e Lihtenshtajnit, shkruan srf.ch.

Sipas të dhënave të Zyrës Federale të Shëndetit Publik (BAG), në mesditën e të martës numri i rasteve të konfirmuara me këtë sëmundje është ngjitur në 16.176, që është 701 më shumë se një ditë më parë.

Kjo rritje është më e vogël po u krahasua me ritmin e rritjes së infektimeve të regjistruar ditëve të fundit, kur dallimi brenda 24 orëve kishte arritur në mbi 1300 raste të reja, shkruan albinfo.ch

Por, numri i vdekjeve, i konfirmuar nga BAG dhe që kësaj here përputhet edhe me atë të wordometer.info, është rritur ndjeshëm. Bëhet fjalë për 373 viktima ose për 78 më shumë se numri që dje e kishte publikuar BAG.

Zyra Federale për Shëndetin Publik ka theksuar edhe njëherë se të dhënat e publikuara nga ajo mund të kenë ndryshim nga ato që mund të komunikojnë kantonet, transmeton albinfo.ch. Shifra e BAG pra mbështeten në informacionet që ajo i merr nga laboratorët dhe mjekët deri në mëngjesin e ditës përkatëse.

---