Nis hetim për Policinë e Shqipërisë që ndaloi artistët nga Kosova nën dyshimet për trafikim armësh

Taulant Balla FB

Ministri i Brendshëm i Shqipërisë, Taulant Balla, të mërkurën ka bërë të ditur se Mbikëqyrjes Policore (AMP) ka nisur hetimet lidhur me ndalimin e një grupi artistësh nga Kosova që u ndaluan nga Policia e Shtetit si të dyshuar për “trafikim të tritolit”.

“Për sa i takon pretendimeve të ndonjë prej artistëve të trupës së përfshirë në objektin e operacionit, për keqtrajtim nga ana e Policisë së Shtetit, informoj se AMP-ja ka nisur hetimin lidhur me këtë. Por pretendimi për orët e tepërta mbajtjes në polici të tyre nuk qëndron, përkundrazi Policia e Shtetit ka vepruar shumë më shpejt se sa afati standard i verifikimeve, pikërisht sepse ka pasur parasysh statusin e aktorëve të ndodhur në vendngjarje. Të cilët sidoqoftë nuk mund të liheshin të lirë pa u bërë të gjitha verifikimet”, ka shkruar Balla në Facebook.

Balla shton se ndjen keqardhje sepse “në vend të mirëkuptimit për faktin se ky operacion rezultoi në kapjen e 203 kallëp tritoli, nxitet keqkuptimi dhe mllefi kundër uniformave blu të Republikës së Shqipërisë”.

Të hënën, anëtarët e shfaqjes “The Handke Project” u arrestuan në vendin ku bëhet pagesa e shfrytëzimit të “Rrugës së Kombit” nën dyshimin se ishin pjesë e grupit të trafikantëve të armëve.