Nisin hetimet kundër një gardisti zviceran të Vatikanit

Dy gra hebreje e akuzojnë burrin se i ka fyer gjatë audiencës së përgjithshme të Papës në fund të tetorit

Vatikani ka hapur një hetim kundër një pjesëtari të Gardë Zvicerane që mbron Papën. Një zëdhënës i Gardës Papnore e konfirmoi këtë për agjencinë e lajmeve ANSA.

Hetimi rrjedh nga një grindje e dyshuar midis rojes dhe dy grave hebreje, transmeton albinfo.ch.

Ato e akuzojnë burrin se i ka fyer gjatë audiencës së përgjithshme të Papës në fund të tetorit. Sipas njërës prej grave, gardisti zviceran kishte bërë gjeste sikur po pështynte me përbuzje në drejtim të saj.

Gjatë së njëjtës audiencë të përgjithshme, Papa Leo XIV kishte deklaruar se Kisha nuk e toleron antisemitizmin dhe synon ta luftojë atë.

Garda Zvicerane funksionon prej shekujsh, në mbrojtje të Papës së Romës, në shtetin e Vatikanit.

---