Një anëtare nga diaspora, pjesë e një institucioni publik në Shqipëri

Anila Hyka Smorgav/Fb

Anila Hyka Smorgrav, nga diaspora shqiptare, do të jetë anëtare e Këshillit Drejtues të Fondit Shqiptar për Zhvillimin e Diasporës. Me këtë rast, ajo bëhet anëtarja e parë nga diaspora, si pjesë e një institucioni publik në Shqipëri, përcjell albinfo.ch.

Këshilli i Ministrave ka miratuar këtë propozim nga ministri Pandeli Majko, sipas njoftimit në faqen zyrtare të ministrit të Shtetit për Diasporën. Anila Hyka Smorgrav do të jetë pjesë e këtij këshilli si përfaqësuese nga Këshilli Koordinues i Diasporës.

“Këshilli i Ministrave miratoi gjithashtu edhe anëtarët e rinj të Këshillit Drejtues të Fondit Shqiptar për Zhvillimin e Diasporës, duke plotësuar kështu numrin e plotë të anëtarëve të këtij këshilli sipas vendimit. “Disa ndryshime dhe shtesa në Vendimin nr.594, datë 09.10.2018, të Këshillit të Ministrave “Për emërimin e kryetarit dhe anëtarëve të Këshillit Drejtues të Fondit Shqiptar për Zhvillimin e Diasporës”, thuhet tutje në njoftim.

Për pjesën e mbetur të mandatit emërohen anëtar të Këshillit Drejtues: Znj. Fjoralba Caka emërohet në vend të Znj. Teuta Vodo, si përfaqësuese nga ministria përgjegjëse për drejtësinë; Z. Kostandin Shkurti emërohet në vend të Znj. Besa Shahini, si përfaqësues nga ministria përgjegjëse për arsimin si dhe znj. Kozeta Angjeliu e cila emërohet në vend të Znj. Mimoza Hysa Çuliqi, si përfaqësuese nga ministria përgjegjëse për kulturën, përcjell albinfo.ch.

Vendimin e plotë mund ta lexoni duke klikuar këtu.