Një studim tregon se nuk ka dallim gjinor në paga, në Zvicër

A janë të sakta këto gjetje?

Sondazhi i ri nga Universiteti i St. Gallenit, i publikuar të martën, nuk gjeti praktikisht asnjë pabarazi në paga midis burrave dhe grave në Zvicër, përcjell albinfo.ch.

Studiuesit e universitetit shqyrtuan analizat e kryera në 461 kompani zvicerane që përdorin metodologjinë e krahasimit të pagave të barabarta të qeverisë. Nga këto, 99.3 për qind u zbulua se ishin në përputhje me ligjin zviceran të pagave të barabarta.

Në total, 89 për qind nuk treguan pabarazi gjinore dhe vetëm 3.3 për qind e diferencave të pagave mbetën të pashpjeguara. Për më tepër, vetëm tri kompani u zbuluan se kishin një hendek pagash prej më shumë se 5 për qind, pragu i tolerancës i vendosur nga qeveria.

Këto janë rezultate shumë inkurajuese, por a janë të sakta?

Studimi është porositur nga Shoqata Zvicerane e Punëdhënësve, një grup ombrellë për bizneset, i cili ka ngritur pyetje në lidhje me mundësinë e njëanshmërisë të përfshirë në analizë.

Nuk është për t’u habitur që sindikatat e quajtën raportin një përpjekje për të “zbukuruar” situatën reale, duke pretenduar se studimi nuk është përfaqësues.

Në fakt, analiza e fundit e kryer nga sindikata SGB/USS zbuloi se gratë marrin mesatarisht një pagë bruto që është 18 për qind më të ulët se ajo e burrave, ose 1500 franga më pak në muaj.

 

---