Njihuni me avokaten më të re në Kosovë

Është 23-vjeçare dhe jeton në Prishtinë. Ajo e ka përfunduar Fakultetin Juridik në Prishtinë, e një pjesë të studimeve i ka kryer në Letoni, në Universitetin “Latvijas Universitat”.

Marigona Lajqi së fundmi është licencuar nga Oda e Avokatëve të Kosovës dhe ka konfirmuar për albinfo.ch se është avokatja më e re në moshë në Republikën e Kosovës.

“Këtë profesion e kam dashur gjithmonë dhe mendoj që kam aftësi te ngre zërin për të tjerët. Mosha nuk mendoj që ka shumë rëndësi dhe unë ndjehem me fat që kam arritur ta përmbush këtë synim në një përiudhë kaq të shkurtër kohore”, ka thënë Lajqi për albinfo.ch.

Gjatë studimeve të saj, Lajqi ka marrë pjesë në një mori trajnimesh dhe ka qenë fituese e disa bursave të mirënjohura në Kosovë dhe jashtë vendit.

Së fundmi, ka kryer edhe provimin e Jurisprudencës që ia hapi dyert e suksesit në profesionin e saj. Ajo tashmë ka hapur edhe zyrën e saj të avokaturës në Prishtinë.

Lajqi pritet të japë betimin solemn të avokatëve në fund të këtij muaji.