Numri i përgjimeve mbetet i njëjtë, me gjithë liberalizimin e bërë

Shërbimi Informativ mund të bëjë përgjime të natyrës preventive. Këtë të drejtë NDB e ka fituar nga 1 shtatori i vitit 2017

Gjatë vitit 2018, autoritetet zvicerane të ndjekjes penale bashkë me Shërbimin Informativ Federal (NDB) kanë urdhëruar masa të përgjimit në 7950 raste, njofton Ministria Federale e Drejtësisë dhe Policisë.

Ky numër është i përafërt me numrin e përgjimeve të urdhëruara në vitin paraprak, shkruan srf.ch. Shifrat mbeten stabile si në përgjimet  në kohë të vërtetë (të drejtpërdrejta), siç është përgjimi i telefonatave, ashtu dhe në përgjimet e bëra pastaj, mbi bazë të regjistrimeve, transmeton albinfo.ch.

Marrja e masave të përgjimit është  urdhëruar për 1.5 % të të gjitha delikteve të regjistruara nga policia gjatë vitit 2018.

Më së shumti përgjime janë bërë në rrjetin telefonik mobil ndërsa në konkurrencë të kantoneve, më së shumti masa të përgjimit janë marrë në Kantonin Vaud. Pasojnë kantonet si: Cyrihu, Gjeneva dhe Berna.

Autoritetet e ndjekjes penale kanë të drejtë të ndërmarrin masat e përgjimit për zbardhjen e krimeve të rënda, ndërsa NDB mund ta bëjë këtë në mënyrë preventive, përcjell albinfo.ch. Këtë të drejtë Shërbimi Informativ e ka fituar nga 1 shtatori i vitit 2017.

Duke qenë se kjo është statistika e parë që përfshin këtë kategori përgjimesh (nga NDB), njohësit e çështjes thonë se ka qenë normale të pritej një rritje e shifrave në këtë drejtim, gjë që nuk ka ndodhur.

---