Nxënësit e klasave shqipe nga qyteti Rosenheim dhe Kolbermoor vizituan Shqipërinë

Foto FB: Shoqata Shqiponja

Nën moton edhe “Ne flasim shqip”, u zhvillua udhëtimi i nxënësve të klasave shqipe nga Rosenheim dhe Kolbermoor në Shqipëri, me qëllim që të lidhnin mësimin me përjetimin, kulturën dhe takimin me bashkëmoshatarët në atdhe.

Udhëtimi i tyre ka nisur në shkollën 9-vjeçare “Lasgush Poradeci” në Tiranë, ku fëmijët morën pjesë në një orë të gjuhës shqipe dhe një të historisë.

Nxënësit u pritën edhe në Presidencën e Republikës së Shqipërisë nga presidenti Bajram Begaj, teksa paraqitën detyrat e tyre dhe shprehën entuziazmin për këtë mundësi të jashtëzakonshme shkëmbimi përvoje mes bashkëmoshatarëve të lindur e rritur në Gjermani dhe atyre që jetojnë në Shqipëri, transmeton albinfo.ch.

“Ne lexojmë, mësojmë dhe organizojmë me përkushtim pjesë teatrale kushtuar figurës së Heroit tonë Kombëtar, Gjergj Kastrioti Skënderbeu. Prandaj, nuk mund të largoheshim nga Shqipëria pa vizituar qytetin simbol të rezistencës shqiptare – Krujën. Në këtë qytet historik, fëmijët vizituan Muzeun Kombëtar të Skënderbeut, ku u njohën nga afër me historinë, armët, simbolet dhe qëndresën shekullore të shqiptarëve. Ishte një përvojë prekëse që konkretizoi atë që mësojmë çdo javë në orët tona të gjuhës dhe historisë shqipe në diasporë. Udhëtimin tonë e bëri edhe më të bukur pjesëmarrja në festën e 1 Qershorit, organizuar nga Presidenti i Republikës”, thuhet ndër të tjera në njoftim.