OBSH paralajmëron për përhapjen e virusit chikungunya nga mushkonjat

@pixabay

Organizata Botërore e Shëndetësisë (OBSH) ka bërë një thirrje urgjente për të parandaluar rikthimin e epidemisë së virusit chikungunya, i cili transmetohet përmes pickimeve të mushkonjave dhe kishte shkaktuar shpërthime të mëdha globale rreth 20 vite më parë.

Shqetësimi aktual lidhet me shpërthime të reja në rajonin e Oqeanit Indian, të cilat tashmë janë duke u përhapur edhe në Evropë dhe kontinente të tjera.

Sipas zyrtares së OBSH-së, Diana Rojas Alvarez, mbi 5.6 miliardë njerëz në 119 shtete jetojnë në zona me rrezik të lartë nga ky virus, i cili shkakton ethe të forta dhe dhimbje të vazhdueshme në nyje, duke çuar edhe në paaftësi afatgjate tek shumë të infektuar.

“Po shohim përsëritjen e historisë,” tha Alvarez, duke krahasuar situatën aktuale me epideminë e viteve 2004-2005, që fillimisht preku rreth gjysmë milioni njerëz në ishujt e vegjël të Oqeanit Indian, para se të përhapej në mbarë botën.

Sipas saj, vala e fundit ka filluar në fillim të vitit 2025, me shpërthime në të njëjtët ishuj të prekur më parë, përfshirë La Reunionin dhe Mauritiusin. Në La Reunion, raportohet se virusi ka infektuar tashmë rreth një të tretën e popullsisë.

Përveç këtyre, raste të shumta janë regjistruar edhe në Madagaskar, Somali, Kenia, Indi dhe Azinë Juglindore.

Një shqetësim i veçantë është rritja e rasteve të importuara në Evropë. Vetëm në Francë, që nga 1 maji, janë raportuar rreth 800 raste të importuara.

Virusi chikungunya nuk ka trajtim specifik dhe ka potencial për shpërthime të shpejta nëse nuk merren masa parandaluese, thekson OBSH-ja. Parandalimi mbetet thelbësor, përmes përdorimit të insekticidëve dhe veshjeve mbrojtëse me mëngë të gjata, pasi mushkonjat pickojnë gjatë ditës.